ຮາມາດ ແລະ ອິດສະຣາແອນ ເລີ່ມການເຈລະຈາຢຸດຍິງຮອບໃໝ່
ສຳນັກຂ່າວ ຫວຽດນາມ ລາຍງານໃນວັນທີ 19 ມີນາ 2024 ນີ້ວ່າ: ອີງຕາມສື່ມວນຊົນເຂດ ຕາເວັນອອກກາງ ໃຫ້ຮູ້ວ່າ, ການເຈລະຈາ
ຮອບໃໝ່ເພື່ອແນໃສ່ຊອກຫາຄຳສັ່ງຢຸດຍິງຍາວນານ ຢູ່ເຂດ ກາຊາ ລະຫວ່າງກອງທັບ ອິດສະຣາແອນ ແລະ ກຳລັງ ຮາມາດ ໄດ້ເລີ່ມຕົ້ນຂຶ້ນ
ໃນຕອນຄ່ຳຂອງວັນທີ 18 ມີນາ 2024 ທີ່ຜ່ານມາ, ຢູ່ນະຄອນຫຼວງ ໂດຮາ (Doha), ປະເທດ ກາຕາ (Qatar). ຄະນະປະຕິບັດງານຂອງ
ອິດສະຣາແອນ ນຳໂດຍທ່ານ ເດວິດ ບາເນ (David Barnea) ຜູ້ອຳນວຍການອົງການສືບລາຊະການລັບ ໂມແສດ (Mossad) ໄດ້ເລີ່ມ
ຕົ້ນການເຈລະຈາຮອບໃໝ່ ດ້ວຍການເຂົ້າຮ່ວມການຮັບປະທານອາຫານຄ່ຳກັບບັນດາເຈົ້າໜ້າທີ່ປະເທດເຈົ້າພາບ ກາຕາ. ສິ່ງທີ່ໜ້າສົນໃຈໃນ
ເຫດການຄັ້ງນີ້ແມ່ນ ຄະນະເຈລະຈາຝ່າຍ ອິດສະຣາແອນ ພັກເຊົາຢູ່ໂຮງແຮມດຽວກັນກັບຜູ້ຕາງໜ້າຈາກຂະບວນການ ຮາມາດ. ແຕ່ເຖິງຢ່າງ
ໃດກໍ່ຕາມ, ສອງຝ່າຍຈະບໍ່ມີການພົບປະກັນ, ບໍ່ມີການຕິດຕໍ່ພົວພັນໃດໆ ແຕ່ຈະໄກ່ເກຍໂດຍຜ່ານຝ່າຍທີ່ສາມທີ່ເປັນສື່ກາງຂອງການເຈລະຈາ.
ຄາດວ່າວິວັດການເຈລະຈາ ຈະແກ່ຍາວໄປເປັນເວລາ 2 ອາທິດ, ເຊິ່ງເປົ້າໝາຍຂອງການເຈລະຈາຄັ້ງນີ້ ແມ່ນເພື່ອບັນລຸໄດ້ຄຳສັ່ງຢຸດຍິງເປັນເວ
ລາ 40 ວັນຢູ່ເຂດ ກາຊາ ໄປພ້ອມກັບເງື່ອນໄຂແລກປ່ຽນຕົວປະກັນ ແລະ ນັກໂທດລະຫວ່າງສອງຝ່າຍ. ຕາມບົດລາຍງານການຕີລາ ຄາກ່ຽວ
ກັບການຮັບປະກັນດ້ານສະບຽງອາຫານ ທີ່ໄດ້ຮັບການຊ່ວຍເຫຼືອຈາກ ສປຊ ນັ້ນໄດ້ມີການປະກາດ ໃນວັນທີ 18 ມີນາ 2024 ຜ່ານມາ ໃຫ້ຮູ້
ວ່າ: ມີປະມານ 50% ຂອງປະຊາກອນຢູ່ເຂດ ກາຊາ ພວມປະເຊີນໜ້າກັບໄພອຶດຫິວ “ຢ່າງຮ້າຍແຮງ” ແລະ ຄາດວ່າໃນເດືອນ ພຶດສະພາ ປີ
2024 ນີ້, ສະພາບການດັ່ງກ່າວຍັງຈະສືບຕໍ່ເກີດຂຶ້ນຢູ່ທາງທິດເໜືອຂອງເຂດດັ່ງກ່າວຖ້າບໍ່ມີການແກ້ໄຂຢ່າງຮີບດ່ວນ.
ແຫຼ່ງທີ່ມາ: ໜັງສືພິມກອງທັບ
ວັນທີ 26/03/2024